مسرحية حول فلسطين

الحقل

تأليف : جين مارلو/ الولايات المتحدة 2010.
ترجمة : كامل الباشا/القدس/فلسطين المحتلة2010.
———–
استنادا الى:
مراسلات البريد الالكتروني بين أسيل وناردين عاصله .
مراسلات اسيل مع زملائه في برنامج مشروع (بذور السلام) .
محاضر الجلسات الخاصة للمؤلفة مع عائلة عاصله في عرابة.
مشاهد لجنة التحقيق (اور) مأخوذه عن محاضر اللجنة ، مع تحوير بعض الاسماء و الشخصيات.
—————
ملاحظة : يمكن تنفيذ هذا النص بعدد يتراوح بين 6-9 ممثلين بحيث يقوم الممثل باكثر من دور باستثناء دوري أسيل وناردين.
الشخصيات:
ناردين : طالبه طب في العشرينات . أخت أسيل الكبرى.
حسن: والد أسيل، في الاربعينات.
عضو مجلس القرية: ذكر في الخمسينات.
أسيل: 16 سنه.
جميله: والدة أسيل ، في الاربعينات.
يهودية : انثى في العشرينات.
سوار: اخت اسيل الصغرى.
براء: اخ اسيل الصغير، عشر سنوات.
مصطفى : ابن عم ناردين، في العشرينات.
موظف: ذكر اوانثى في الثلاثينيات.
جيري: مستشار امريكي للمخيم ، ذكر في الثلاثينيات.
ريم : 15 سنه.
بنت يهوديه ، في العشرينات.
بنت يهودية: عضو في برنامج بذور السلام ، 18 سنه.
متسوقه يهودية : في الثلاثينيات.
متسوق يهودي : في الثلاثينيات .
ضابط بوليس يهودي: ذكر أو انثى.
ياعيل: فتاة يهودية في العشرينات.
القاضي أور : في الستينات.
حاي :ضابط بوليس يهودي. العشرينات.
حانان: ضابط بوليس يهودي. العشرينات.



المنظر المسرحي: المنصة شبه خالية ، بعض المكعبات و المستويات يمكن تحويلها لعدة اشكال حسب الحاجة. اضاءة خافته تتحول تدريجيا الى ظلام وفي الخلفية تسمع اغنية " تغيير" لتوباك بلاريس. تنقطع الموسيقى فجأة.
—————————————
ناردين :
في راسي شغلة واحدة بس: لازم اشوفك، لازم اشوفك ، لازم اشوفك.
حسان :
راح يجيبوه هون ، يجيبوه هون.
ناردين:
جابوك بالاسعاف ، حطوك بغرفتي. عشان يجهزوك. يلفوك بالقماش الابيض. واحنا بنستنا، حطوك في الصالون جواة صندوق خشب. في دارنا حوالي 300 بني ادم. كتير ضجه.
عضو المجلس:
اتركو اهله يودعوه يا جماعه. بوسو خدوده وسامحوه.
ناردين:
الكل واقف فوق راسنا، يلعن ! شو بيعملو هون؟ اتركونا بحالنا! الكل بيجي وبيصرخ ، انا مش فاهمة ، مش لاقيه فرصة…..
أسيل:
مرحبا خيتا ، شكرا على الكالونيا ، فرصتي الان اني الاقي صاحبه زادت 20%. واذا بحلق دقتي بتزيد كمان 13%. واذا بيل غيتس تبع الكمبيوتر خسر البزنس شيتو ، فرصتي بتنزل لحد 4 بالمليون ايمتا بدها تزبط معي 100% ؟ اذا رفيقتك بالغرفة ظلت عزابيه لبعد اربع خمس سنين خليها تتصل على بلفوني، بلكي زبطنا حالنا. سلاماتي للجميع ، مع حبي اسيل المخبوط على قفاه/ المعروف بالمتزحلق.
ناردين:
مرحبا خيّا ! مش قادرة أصدق انك اشتريت كمبيوتر جديد وبعثتلي القديم ! أغنية ( غوغو دولز) الي منزلها على سطح المكتب كلماتها روعة ، أثرت في كتيير.
على كل حال ، سوار لسا بتضايقك؟ معلش هيك المراهقين لازم يكونوا مزعجين ، صح؟ انا مروحة على عرابه يوم الاربعا اختارلنا فيلم على زوقك في السينما لاني وعدت براء انو يكون هدية عيد ميلادو التاسع. بحبك ، مشتاقتلك ، ناردين.
أسيل:
حلو كمبيوتري ، لا ؟ مش احسن من انك تقضي وقتك بالاستمتاع بتشريح الجثث؟ انا بعدني غرقان بالمهاترات والجدالات ، ولازم ادبر حالي مع حماقات البرت وايزك المتعلقة بتفاحه وقعت عن الشجرة.

ناردين:
بيسعدني ابلغك انه اعصاب الوجه بتتفرع عنها خمس فروع: الاعصاب المؤقته اعصاب الفك السفلى ، الشدق ، الاعصاب الهامشية ، الفكين. فهل كنت تعلم ذلك؟ الامتحانات قربت مش عارفة ليش مش حاسة بتوتر ، المفروض انتف شعري من التوتر زي بقيت زملائي.على كل حال ، انا بحب شعري وبدي يضل محله ، بظن اني لما أخلص دراستي راح أقدر اشخص مشكلة وجهك وممكن أكون لطيفة واساعدك في تصليحه.
أسيل:
يا الله شو بتحبي الحكي، بمزح معاكي ، بتقدري تكتبي في أي وقت عن أي شي حتى عن تالوله او دمله طلعلك على الطرف العلوي من منخارك ، طلعتلك وحده ولا لسا؟ بالنسبة لوجهي …اذا بتتمسخري علي كمان مرة ، برفصلك مناخيرك الصغار لحد ما ينتفخو زي طابه الفوتبول…كيف ابتتجرئي وبتقولي عني بشع وانه وجهي محتاج تصليح؟…. روحي دوريلك على……..! طيب انا لازم اروح ادرس تاريخ……بنتلاقى في عرسي هادا اذا لاقيت واحده هبله تقبل في.
ناردين:
لازم اصفك عالحيط واطخك!! ليش ما بعتلي ايميل اخر يومين؟ اعطيني سبب واحد عشان تنقذ حياتك ! امي بتتصل في كل فترة وما بتحكي غير عن سفرتي لبراغ. ابوي ولا مرة بيتصل. سوار عايشه على كوكب اسمو طز في الكل. وبراء مش سائل / في اشي غلط؟ انا عملت اشي ازعجكوا؟ ضايقكوا؟ انت الوحيد اللي بحكيلو عن مشاعري واذا فسدت لامي اعتبرحالك ميت!خالد اتصل في وحكينا 4-5 ساعات. بيقول انو حكا معي كثير لدرجة الادمان، بعرف بعرف اكيد قرفتك بحكيي. بس عن جد اسا ، بتكر انو ممكن هالعلاقة تجيب نتيجة؟ النجدة ، النجدة، الاخت الكبرى تطلب المساعدة من الاخ الاصغر ! انتهى.
اسيل:
ليش ما بعتلك ايميل؟ الزفت الفيزيا هي السبب. انا بكره الامتحانات. بالنسبة للشخص المذكور برسالتك بعرفش ، بطلنا في الروضه ،الناس مش لطيفين لانهم لطيفين ، خصوصا في مواضيع الشباب و البنات. اذا كان محترم راح تحسي لحالك. ما تنهبلي وتفكري حالك بتمثلي فيلم. محتارة. روحي اقرئيلك كتاب. بيحكي انه الراس ماكنه انتاج بخار. شوفي يا بنتي انبسطي في براغ ، اسمعت انه الجثث هناك عايشة وبترقص و بتقدري تلمسيها مش متل اللي في هالبلد ما بيسمحولنك تلمسي حدا الا اذا كان ميت. بالمناسبة انا بفكر اغير طريقة حياتي ـ اقل كمبيوتر ، اقل سهر ، الركض وقت الفراغ. حاليا انا بضيع وقتي عالكمبيوتر. المتزحلق.
ناردين :
معقولة اكون فهمتك صح؟ بدك تغير حياتك ، تعمل اشي غير انك تقضي وقتك عالكمبيوتر؟ اواه! ايتها الكائنات الفضائية ، ماذا صنعت لاخي؟ عن جد ، اذا هالحكي مزبوط انا مندهشة ، قصدي مبروك. بس ممكن افهم شو اللي صار ؟
(جميله تتصل)
جميلة :
ناردين!!
ناردين:
اهلين ماما .

جميلة:
اسيل في مظاهرة هان في عرابه ، احنا كمان بالمظاهرة ، بحاول الاقيه بدون فايده. بدوش يسمع كلامي ، ليش ما تحاولي تتصلي فيه ، احكي معاه بلكي سمع كلامك.
ناردين: " تتصل بالمحمول"))
اسيل " صوت تسجيل ذاكرة الكترونية"
هلو ؟
ناردين :
اسيل يا اهبل!! امي قلقانه عليك! حرك قفاك وارجع عالدار!!
اسيل " تسجيل صوتي"
مش قادر اسمعك مزبوط بتقدري تتركيلي مسج. بيييييييييييييييييب
ناردين :
مسج!! " للهاتف" يلعن . (تتصل بهاتفها ) بابا!
حسان:
فش اشي شوية شرطة وشوية شباب ، الوضع هادي مش عم بصير اشي.
ناردين:
امي، ام تقليدية بتعبر عن قلقها. طبعا مش راح تسمعلها. بعرف انه الانتفاضة التانية بدت لما الفلسطينية انقتلوا في القدس. الناس طلعت تتظاهر بالقدس و الضفة وغزة وزاد عدد القتلى و الجرحى يوم ورا يوم. فتحت الراديو … تقارير عن اغلاق الشوارع في اسرائيل بسبب المظاهرات.
(جميلة تتصل)
جميلة:
شو ؟ احكيتي معاه؟
ناردين:
حاولت ، بلفونو مسكر.
جميلة :
اتركيلو رساله.
ناردين:
يما لما يكون بلفونو مسكر مش راح يقرا الرساله.
جميله:
البلفون بيعطهوش اشارة؟
ناردين:
البلفون بيعطي اشارة بس لما يكون شغال .
جميله:
انتي بس ابعتيها رساله!
ناردين :
يما مش راح يقراها.
جميله:
ممكن تعملي اللي بقلك عليه وخلص؟
ناردين :
حاضر ( تقطع المكالمة وتكتب رساله) ارجع عالدار ! امك قلقانه.
سكنا في حيفا لحد ما صار عمري 12 سنه. العرب واليهود مع بعض وكان عندي اصدقاء يهود. بس عمري ما نسيت قصه عيلتنا . في الدار كان عنا صورة كبيرة لخارطة فلسطين. قبل 48 وعليها أسامي كل القرى اللي دمروها . القصص عن فلسطين ما ابتنتهي . حياتنا ما بتبدا من اللحظة اللي انولدنا فيها ، اهلنا حاولو يفهمونا لما كنا صغار ، لكن القصة مش سهلة.
جميلة:
التعليم ضروري لحتى تقدري تاخدي حقوقك. لما بقينا صغار ، ما كنا قادرين نشتري كتب ، أو نتعلم او نروح أي مطرح…..وهادا خلانا نحاول نعوض من خلالكو.
ناردين :
بس يما حياتنا مليحه هلأ مزبوط؟ ؟ عنا دار. انتي وابوي بتشتغلو، ليش التذمر؟
جميلة:
شوفي ، هاي الاشياء ما حدا اعطانا اياها ، احنا اشتغلنا عشراضعاف ما بيشتغل أي يهودي ، اذا بدي اشي لازم اكون قوية واصارع عشان احصل عليه ، وعلى كل المستويات الفردي و الجماعي و السياسي. احنا ما منقدر نفصل حالنا عن الفلسطينين في الضفة وغزة. احنا شعب واحد. احنا محظوظين لانهم دمروا قريتنا وما تشردنا متل غيرنا . اللاجئين في الضفة و القطاع ….فش عندهم مي ولا كهربا ولا مدارس مليحة. بدك تندمجي في المجتمع حاولي قد ما بتقدري تبني حياتك و شخصيتك بس ما تنسي اصلك وتاريخ شعبك .
حسان :
انتي فلسطينية ، إحنا جذورنا مزروعة في هالارض مثل شجرها وأحجارها وترابها ، انتي عربية فلسطينية عايشه بإسرائيل إحنا ما أخترنا هويتنا ، الحكومة الإسرائيلية فرضتها علينا.
ناردين:
احنا هون، موجودين ، كثير يهود بيعرفوا هالحكي بس بيحاولو يتجاهلوا وجودنا لما افرض حالي على وعيهم بيعبروا عن دهشتهم:

فتاه يهودية:
من اين انت؟
ناردين:
من عرابة.
فتاه يهودية:
اين؟
ناردين:
عرابة قرية عربية قريبة من كارمئيل.
فتاه يهودية:
اه. انت عربية.
ناردين
اجل.
فتاه يهودية:
اذن لا بد ان تكوني مسيحية.
ناردين:
لماذا؟
فتاه يهودية:
لا اعرف لا يبدو انك عربية.
ناردين:
اللعنة وكيف يبدو العربي؟
فتاه يهودية:
كلا ، ما اعنيه هو …..انت تتحدثين العبرية بطلاقة… وملابسك تشبه ملابس أي يهوديه. انت لا تضعين الحجاب…تبدين منفتحه جدا وقوية و….
ناردين:
واذن؟ هل تعتقدين ان العربية المسلمة في هذا البلد لا يمكن ان تكون ما ذكرتيه.
فتاه يهودية:
لا انت استثناء.
ناردين:
قريتنا تبعد عشرة دقائق عن كرمئيل ، ولكن سكان كرمئيل غير معنيون بنا. انهم مرتاحون لجهلهم ، لا يريدون التعلم، لا يعرفون عدد ابنائنا في الجامعات. عدد الحاصلين على الدكتوراه . انهم ببساطه ينكرون وجودنا. وعندما يقابلوني يقولون: اوه، انت استثناء. في سن المراهقة ، عندما كان احدهم يقول لي انني استثناء كنت أتصور أن هذا يعني إنني مميزه ، انا العربية الوحيدة التي تتحدث العبرية بطلاقه و الانجليزية كذلك. أنا العربية الوحيدة الليبرالية المتفتحة، وكان ذلك يمنحني شعورا جميلا ، انا مميزة.
(يرن الهاتف)
سوار:
انا سوار ، اخدوا اسيل عالمستشفى.
ناردين :
شو؟
سوار:
طخوه بكتفو بس ابوي بقول انه بخير.
ناردين:
وين ودوه؟ أي مستشفى.
سوار :
بعرفش.
ناردين:
تلفنت عكل المستشفيات في الشمال. سالت عن اسمك في طبريا وفي حيفا كل المستشفيات وكل الناس اللي بعرفها، ابن عمي مصطفى رد علي.
مصطفى :
اخذوه عمستشفى نهاريا.
ناردين:
تركت شغلي ورحت عمحطة الباصات ، بدون اغراض وبدون شنطه. (على الهاتف) بابا؟
حسان:
فش حاجة تروحي الوضع مش خطير، ضربوه بس الوضع مش خطير. الطرق مسكره ما تحاولي توصلي راح تعلقي بالطريق.
جميله:
روحي عالدار.
ناردين:
من محطة الباصات في القدس، أخدت الباص لتل ابيب ومن هناك بالقطار لنتانيا ، طول الطريق وانا اتخيل كيف بدي الاقيك بالمستشفى… اضربك كف على راسك واقولك: هبيله، خسرتني يومين شغل، شو اللي خلاك تروح هناك وتخليهم يطخوك، تعطلني عن شغلي وتقلق الكل عليك!! اوعى تعيدها مرة تانية! وانتا راح ترد وتقول.
أسيل" بخجل" :
متأسف !
ناردين: " بتأثر"
طز عليك ، استاصلوك اللوّز في المستشفى، كان عمرك ثلاث سنين. كانو لوزك كبار. ما كنت تقدر تبلع وكنت تشخور بالليل. صارو يجيبولك بوظه وامي تشتريلك كومة العاب وسيارات وخيول بلاستيك، بيضا وسودا وكمان سيارة اسعاف, ماما انا كمان بدي تقيمولي اللوز! لما امي شرتلنا صحون عليها اشكال من شارع سمسم، كنا نتقاتل مين بدو ياخد صحن الوحش اللي بحب البسكويت !
جميله:
مش مشكلتي من ياخد شو، حلو مشكلتكو بحالكو.
ناردين :
طبعا انت كنت تاخد الصحن بالاخر، وبعد دقيقتين ترميه، ما كان بيهمك الصحن ، كان همك تفوز بالمعركة. وبعدها تقاتلني عالليغو.
أسيل:
بدي شباكين لداري!
ناردين :
أعطيني واحد لداري.
أسيل:
هاظا الليغو تبعي! وانا بدي شباكين!
ناردين:
ابني انتا سفينه فضاء انا بدي ابني بيت، اعطيني اربع قطع كرميد اعمل الحيطان وانتا اعمل سفينه الفضاء و القصر تبعونك. واخ! (محبطة من ما يفعله اسيل بقطع الليغو). ابتعمل اشياء معقدة. انا كل اللي قادره اعمله بيت صغير بدون بابا وبدون شبابيك، بطلت العب.
(رنين الهاتف)
مصطفى:
نادرين أنا ابن عمك مصطفى. تروحيش عنهاريا. أمك وابوكي طلعوا من المستشفى. البوليس منعهم يبقوا مع أسيل. انزلي من القطار.
ناردين:
وين أنزل.
مصطفى:
بعرفش المهم تنزلي .
ناردين:
ونزلت في حيفا عشان اركب الباص لكرمئيل. ابتتذكر لما كنت في تل ابيب مع اثنين من ولاد صفك؟ كان مفروض نلتقي بحيفا ونركب سوا لعرابه، ضليت اتصل فيك….
أسيل:
بعد خمس دقايق بوصل ، خمس دقايق.
ناردين:
يا الله ، خلص تتخوت علي! انتا وصحابك ركضتوا عشان نلحق الباص (مخاطبة اسيل) الباص طلع ، تأخرتوا!!
وركبنا باص كرمئيل واستنينا ابوي يجي يوخدنا وانتا…..
أسيل:
هه، النسوان ، مش قادر افهمهن. ليش دايما بتوتروا بسرعة؟
ناردين:
كنت دايما تقوللي….
اسيل:
اتمتعي بالحياة.
ناردين:
متمتعه!
أسيل:
ليش انتي عندك حياة! شو هالحياة دخلك؟
ناردين:
دايما ، دايما ، دايما ، لاني كنت ادرس وما كان عندي وقت لاي شي تاني . ممكن تنزللي الاغنية اللي سمعناها قبل شوي.
أسيل :
خيتا الاغنية هاي صارلي منزلها عالكمبيوتر سنتين.
ناردين:
بس هاي اول مرة بسمعها!!
اسيل :
خيتا انتي وين عايشة، حدا بيسمع اغنية بعد سنتين؟ عيشي!
(صوت الهاتف النقال)
حسان:
ناردين، ما تروحي لكارمئيل ، الطرق مسكرة مش راح نقدر نيجي ناخدك.
ناردين :
نزلت من الباص بكريات بيالك ، ابوي عم يبكي ، وصوت امي وراه بتصرخ ، ( لحسان ) شو اللي عم بيصير ؟ كيفو اسيل ؟
حسان :
ناردين، اسمعي ، اصابتو خطيرة بس راح يتحسن.
ناردين:
عندها بس فهمت، اسمع ، عندي طلب صغير، اذا عن جد بتحبني ما تخليهم يوخذوه قبل ما أشوفه.
حسان:
وين ياخذوه ؟ قلتلك ، اصابتوا خطيرة بس راح يتحسن.
ناردين:
احكي اللي بدك ياه – الاشي الوحيد المهم بالنسبة الي - ما تخليهم يوخذوه قبل ما أشوفه.
(تغلق الهاتف)
محتاجه اشوفك قبل ما ياخذوك" ابناؤكم ليسوا لكم، انهم ابناء وبنات الحياة" – النبي لجبران خليل جبران . سهل نحب اولادنا ، سهل نحب بناتنا ، بس اعلى درجات الحب هيه اللي حكا عنها جبران. ان نحبهم كابناء للحياة. ان نحبهم الى درجة تمكننا من التخلي عنهم ليعيشوا حياتهم. هيك ابونا حبنا.
أبوي كان سجين سياسي،علمنا خلاصة تجربته الاعتقالية، لكا منا نتأخر بالسهر كان يقول:
حسان:
لما كنت بالسجن كنت اصحى الساعة سته الصبح ، اعمل رياضة واتعلم الانضباط!! السجن علمني الانضباط ! ليش بتضيعوا نهاركم قبال التلفزيون؟ لما كنت بالسجن قريت الاف الكتب.
ناردين:
ما حكالنا عن تفاصيل تجربته الاعتقالية ومعاناتو غير لما كبرنا ، كان رافض يزرع الكره جواتنا واحنا أطفال:
حسان:
في التحقيق عذبونا ، بكسات وضرب بالعصي . كانو يربطوا ايدي ورا الكرسي و المحقق يقعد قبالي عالطاولة ويدحش بسطاروا بين رجلي، هاذا غير التعذيب بالكهربا.
ناردين:
لو خبرنا واحنا صغار كان ما قدرنا نعيش جواه المجتمع الاسرائيلي، كان صعب نندمج معاهم ونقدر نعيش حياتنا.
حسان:
وانا صغير ، ما كان الواحد يقدر يترك البلد بدون تصريح من الحاكم العسكري. التمويل الحكومي للزراعة كان يطور مزارع اليهود ويدمر مزارع العرب. عشان نقدر نشتغل في مزراعهم كنا مضطرين نغير اسامينا لاسامي يهودية، انا كان اسمي يافت. معظم الاراضي العربية تصادرت. عشان هيك سنة 76 عملنا يوم
الارض ، يومها خسرنا ست شهدا وميت جريح.
لازم تشعري بالفخر لانك فلسطينية، عربية، انسانه، حرية طرف مش لازم تكون على حساب الطرف الثاني. الله ما اعطى حق لشعب واحد. حبي الله و الناس وكونيادميه ، احنا لازم نناضل . لازم نكون اقوياء. الاحباط مرفوض وطالما صراعنا مستمر طالما بقي الامل موجود.
ناردين:
كنت مفكرة اني بقدر اغير شي. ممكن تمر سنين وسنين من الجهد و التعب ولكن في النهاية راح يحصل تغيير حتى لوكان صغير. شاركت بمظاهرات يوم الأرض، وبالاحتجاجات وجمع التبرعات. وفي المظاهرات اللي صارت بعد ما دخل غولدشتاين عالحرم الابراهيمي بالخليل وارتكب مجزرة ضد المصلين.بعد ما عامي بوبر صف السبع عمال عالحيط واغتالهم. لكن ولا شي تغير، وبالرغم من انه زاد احباطي الا انه صار عندي قوة وتصميم اكبر عالمقاومة تحولت من الشعور بالتميز للشعور بالغصب. لا ! أنا مش استثناء! اتصلت بمصطفى عشان يوصلني.


مصطفى:
انا قريب على (مسجاف) بصلك بعد نص ساعة.
ناردين:
مسجاف فيها بركة، بعيدة عنا ربع ساعة. تعودنا نسبح فيها . علاقتي مع افراد مجموعتي ما كانت طيبة ، بعكسك انتا كنت تلعب وتمرح معاهم، اما انا فكنت انزل عالمي اسبح وبعدين اطلع من المي، هادا هو. كنت تحب الاولاد هناك وتستمتع معاهم. دبرت حالك واندمجت وانا ضليت احس بالغربة. المسؤولين عن البركة رتبوا المواصلات لكل المشتركين في البركة، بس ….
مسؤول البركة:
لا توجد إمكانية لترتيب المواصلات الى عرابة.
جميلة:
ولكن هناك باص يصل عرابه.
مسؤول البركة:
عرابه ليست على قائمة مسجاف. انا اسف.
ناردين:
المواصلات لولاد اليهود وبس. امي عملت قصة كبيرة.
جميلة:
راح اطلعهم من دورة السباحه وارجع مصرياتي.
ناردين:
وبعد مفاوضات صرت كل مرة بدي استعمل المواصلات لازم اتصل بالمكتب. كل أحد واربعا اذكرهم ، صرت اكره اتصل، ما كملت سباحه، بطلت.
مصطفى وقد وصل)
اصابته خطيرة.
ناردين:
مصطفى خلص عاد أسيل مات.
مصطفى:
لا ، الوضع خطير، بس ….
ناردين:
مصطفى خلص.
مصطفى:
بقلك ما مات ، اصابته خطيره.
ناردين:
بتقدر تقول اللي بدك اياه بعد ربع ساعه بنوصل الدار وبتبين الحقيقة. وصلنا الدار نزلت من السيارة حتى ما اتطلعت على مصطفى عشان اقوله مش قلتلك.
عبطت ابوي ما كنت قادرة حتى اسمع صوته،عيونو فيهن اشي. عيونو بتتطلع من خلالي.
جميلة :
ناردين، اعز اصدقائك مات! قتلوا اغلى اصدقائك يما!
ناردين:
وين سوار وبراء؟
بتتذكر لما كنتو انت وسوارصغار. سوار كان شعرها كيرلي وضخم كان عمرها سنتين وانتا خمسة ، مش متذكره شو اللي خلاك تزعل منها. كان عندك لعبة سيارة عالبطاريه وحطيتها بشعرها. وصرت تسوق لقدام ولورا. وعلقت بشعرها!
لقيت سوار جواه الدار.
سوار:
ابن صف اسيل اجا عدارنا من الصبح، استغربت لما شفته زمان ما زارنا. صحيت اسيل من النوم، بعد شوي اجا كمان واحد واخذهن وراحوا. ما قالولي وين رايحين. وانا ما سالت .
اسيل عمرو ما اشترك بمظاهرة ، مش عارفه شو اللي خلاه يروح.
ناردين:
براء في غرفتك، على سريرك. قاعد. بيبكي بهدوء. بتذكر انك دايما كنت تزعل منه لأنه بيقاتلك عالكمبيرتر.
براء:
كنا نلعب عالكمبيوتر سوا مبارح. تنشوف مين اشطر ، لما طلع اليوم طلبت منه يجيبلي اشي للكمبيوتر. ليش راح بدون ما يحيكي؟ مين بدو يساعدني بواجباتي؟ مين بدو يساعدني عالكمبيوتر؟
ناردين:
القهوة ساده في الصالون. صمت أغلب الوقت باستثناء بكا النسوان وصوت امي….
جميلة:
أسيل بقا صديق ناردين. صديق ناردين مات !! كانو صحبة عالاخر. اعز صديق لناردين مات !!
ناردين:
راسي بوجع. اعطيني أي شي يودي الصداع!!
حدا اعطاني اشي، مش متذكرة مين. حبة حبوب. شربتها وحاولت أنام . الدار ملانه ناس، عمام وخوال وعمات وخالات . في الصالون فرشنا على الارض ونمنا. ابوي نام برا عالبرندة.
حسان:
ما طلعته من المظاهرة ، ما سحبتوا عالدار، كنت بعيد عنو كم من متر ومقدرتش اعمل اشي.
ناردين:
يا الهي، معقوله ابوي ينهار؟ اذا صارلوا اشي مين بدو يحميني؟
صحيت بكير على اصوات العصافير.حسيت كل شي متغير ، بعدها تذكرت انه اخوي مات، سامعين صوت العصافير. (تصرخ على العصافير) اخرسوا !
تفعل ما تقول))
فتحت خزانتك وأخذت واحد من بلايزك تبعون بذور السلام ولبستها ، عشان أقرب منك. قبلوك تشارك في المشروع ، بذور السلام : مخيم للتعايش العربي الإسرائيلي في امريكا. اختارتك وزارة المعارف كعضو في الوفد الإسرائيلي.
أسيل :
أنا مسافر عامريكا!!
ناردين:
مبروك ! بعرفش اشي عن المشروع ولا عن إجراءات التسجيل. فكرت انها وسيلة مليحة تتعرف على أصدقاء جدد. أول مرة وصلناك فيها لاجتماع تحضيري . ملان اولاد بيلعبوا مع بعض، ما حدا لعب معاك (لجميلة) بتفكري بدبر حالو؟ كنت خايفة تحس حالك غريب، منبوذ !
أسيل:
هاي ناردين! المخيم روعة التخوت ، المشرفين ، الاولاد ، الاكل . اليوم كان شتا عنا عشان هيك ما عملنا كتير اشياء ، بس برضو انبسطنا. كيف أبوي؟ امي؟ انتي، انتي بخير؟
نظفتي الدار ولا ابتستيني ارجع؟ بحبكو كلكو يا عرب عرابة العرب شو مشتاقلكو.
قولي لأمي ما تقلق اذا ما اتصلت وقوليلها انهم بيديروا بالهم علينا هان. على فكرة اكتشف اني لاعب بيسبول عظيم. احسن واحد في الموجودين ما عدا الامريكان
بتعرفي الامريكان البسبول بدمهم.!
ريم :
صديقي في بذور السلام، نعم هاي أنا ، اسمي ريم وعمري 17 سنة. هل تعرفني؟ هل حقا تعرفني؟ اشعر بالارتباك . كفتاه عربية فلسطينية أعيش تحت الحكم الإسرائيلي . من الصعب ان أعيش ازدواج الهوية ، فمن ناحية انا جزء من المجتمع الإسرائيل واحمل الجنسية الإسرائيلية . ولكنني من الناحية الأخرى ارتبط بقوة بفلسطينيتي وعروبتي . انا عالقة بين عالمين . هل أنا غريبة ؟ هل من الممكن أن يعيش هاذان العالمان جنبا الى جنب؟ أرجو أن تنصحني.
أسيل:
عندما خلق الله هذا الكوكب، لم يخلق فيه حدودا، لم يضع الحواجز بين الدول. ولا أذكر انه منحنا جوازات سفر أو بطاقات هوية. كان كوكبنا مكانا حرا ، لكن وبمرور الزمن تغيرت الأمور..
انت بين عالمين، كما قلت ، ولكنني لا أوافق انك عالقة بينهما. لان ذلك يعطي انطباعا بأنك لا ترغبين بالبقاء، العالمان يوجهانك، وكأنك تضعين حياتك بأيدي الآخرين. لم يخترأحد ان يكون صينيا/ إسرائيليا/ أو فلسطينيا، نحن ببساطة ولدنا كذلك؟ وستكونين دوما ما تريدين أن تكوني.
انا لا استطيع محو كلمة اسرائيلي من جواز سفري، او كلمة عربي، وهي كلمة اشعر بالفخر كلما سمعتها. نحن لا نستطيع تغي